Әйел 66 жасында оныншы баласын дүниеге әкелді

Германияда 66 жастағы Александра Хильдербрандт экстракорпоралдық ұрықтандырусыз (ЭКО) табиғи жолмен босанып, ұл бала дүниеге әкелді,деп хабарлайды POLITICO.KZ Bild басылымына сілтеме жасап.

Бұл оқиға Берлиндегі Шарите ауруханасында орын алып, 19 наурызда Филипп есімді сәби кесарь тілігі арқылы өмірге келді. Салмағы 3,5 келі болған нәресте анасының айтуынша, толықтай табиғи жолмен, ешқандай гормондық дәрі-дәрмексіз дүниеге келген. Хильдербрандт жүктілік кезінде еш қиындық сезінбегенін, сондай-ақ денсаулығы мықты екенін атап өтті.

Филипп – көпбалалы ана атанған әйелдің оныншы баласы. Ең үлкен қызына 46 жас болса, кенже қызы небәрі 2 жаста. Соңғы 12 жылда Хильдербрандт сегіз рет босанған, яғни 54 жасынан кейін де белсенді түрде ана атанып келеді. Оның айтуынша, үлкен отбасы – тек бақыттың белгісі емес, сонымен қатар балаларға тәрбие беру үшін маңызды орта. Ол шылым шекпейтінін, ішімдік ішпейтінін және ешқашан контрацепция құралдарын пайдаланбағанын айтты. Салауатты өмір салтын ұстанатын әйел жүзумен айналысып, күн сайын бірнеше сағат бойы жаяу жүретінін де атап өтті.

Жүктілік туралы жаңалықты жақындары жылы қабылдап, тек қолдау көрсеткен. Оның акушер-гинекологы Вольфганг Генрих бұл жүктіліктің ешбір күрделі асқынусыз өткенін растады. Дегенмен, АҚШ-тағы бедеулік маманы Брайан Левин 66 жастағы әйелдің табиғи жолмен бала көтеруі – өте сирек әрі ерекше жағдай екенін атап өтті. Оның айтуынша, мұндай жүктілік ана мен бала үшін қауіп төндіруі мүмкін. Дәрігер бұл жастағы әйелдің, егер поликистозды аналық без синдромымен ауырса, менопаузаның кешігуі арқылы жүкті болу мүмкіндігін сақтап қалуы ықтимал екенін түсіндірді.