Әжейдің қабырғасын сындырған полицей жұмыстан қуылды

Алматы облысында зейнеткерді үйінен күштеп шығару кезінде оның қабырғасын сындырған полиция қызметкері жұмыстан босатылды. Бұл туралы ақпаратты тележүргізуші Динара Сәтжанның QOGAM news Telegram-арнасы хабарлады.

Қайғылы оқиға қазан айының басында Өтеген батыр ауылында болған еді. Сот орындаушыларының 77 жастағы әжейді үйінен шығаруы кезінде тәртіп сақшысы оны итеріп жіберген. Сүйенішке соғылған кейуананың кейіннен қабырғасы сынғаны анықталды. Бұл сәт видеоға түсіп қалып, әлеуметтік желіде қоғамдық резонанс тудырған болатын.

ІІМ басшысы Ержан Сәденовтің хабарлауынша, әжейге күш көрсеткен қызметкер ішкі істер органдарынан шығарылды. Сонымен қатар, оның тікелей басшыларына қатысты да тәртіптік тексеріс басталды.

Еске сала кетейік, оқиға 2 қазанда орын алған. Видео тараған сол күні Алматы облысы полиция департаментінің бастығы Мейрам Әбікеев әжейге дөрекілік көрсеткен қызметкерге қатысты тергеу тағайындалғанын хабарлаған еді.