Байбазаров: «Бюджет дефицитінің болуы қалыпты жағдай»

Қазақстан тарихында бюджет әрдайым дефицитте болған. Бұл туралы премьер-министрдің орынбасары – Ұлттық экономика министрі Нұрлан Байбазаров мәлімдеді, деп хабарлайды POLITICO.KZ.

Мәжіліс депутаты Еркін Әбіл бюджет тапшылығы үшін жауапкершілік Ұлттық экономика министрлігінің басшылығына жүктелуі керек деп мәлімдеді. Оның айтуынша, министрлік бюджетті дұрыс жоспарламай, тәуекелдерді ескермеген.

Министр Байбазаров бұл сынға жауап беріп, бюджет тапшылығының қалыпты қаржылық құрал екенін айтты.

«Қазақстан тарихында бюджет әрдайым дефицитте болды. Бюджеттің екі түрі бар: профицитті және дефицитті. Бізде бюджет дефицитті, себебі дефицит — бұл бюджеттің бір бөлігі. Бұл қаржылық шығындарды қаржыландырудың құралы. Бюджет кодексін оқып шығу қажет: онда дефициттің белгілі бір шектеулер аясында қарастырылатыны көрсетілген. Біз дефицитті жоспарлы түрде азайту бойынша жұмыс жасап жатырмыз. Табыс бөлігін арттырып, шығындарды оңтайландырамыз», — деді министр.

Оның айтуынша, бюджет қаражатын мақсатты пайдалану мен жоспарлауға қатысты талаптар жыл сайын қатаңдатылуда. Сонымен қатар, дефициттің өзі қаржылық тәртіпті бұзу болып табылмайтынын атап өтті.