Базалық мөлшерлеменің өсуіне байланысты баспана бағасы қалай өзгереді

Қазақстан Ұлттық банкінің төрағасы Тимур Сүлейменовтің айтуынша, базалық мөлшерлеме тұрғын үй бағасына тікелей әсер етпейді,  деп хабарлайды POLITICO.KZ. 

Сүлейменовтің айтуынша, базалық мөлшерлеменің көтерілуі инфляцияны төмендетуге бағытталған, демек, жалпы бағаның, соның ішінде шаршы метр құнының өсуін тежеуге әсер етеді.

«Мұнда тікелей әсері бар деп айта алмаймыз: базалық мөлшерлеме инфляцияны төмендетуге бағытталған. Ол жалпы инфляция деңгейін және оның құрамдас бөліктерін, соның ішінде тұрғын үйдің шаршы метрі құнын төмендетуге арналған. Сондықтан бағаның жалпы деңгейі төмендеген сайын, тұрғын үй бағасының да тұрақталуына үміттенуге болады», – деді Сүлейменов Ұлттық банктегі брифингте.

Ұлттық банк төрағасы мөлшерлеме – бұл экономикаға әсер ететін құралдардың бірі ғана екенін атап өтті. Тұрғын үй нарығына басқа да факторлар ықпал етеді: құрылыс материалдарының бағасы, жобалық және инженерлік жұмыстардың құны, жалақы деңгейі және азаматтардың баламалы инвестициялық құралдарға салым жасау мүмкіндігі.

«Мұнда тікелей тәуелділік жоқ, мұны түсіну маңызды. Дегенмен, базалық мөлшерлеменің төмендеуі экономикалық баға деңгейіне әсер ете отырып, тұрғын үй секторындағы бағалардың да тұрақталуына және төмендеуіне жалпы түрде ықпал етуі тиіс», – деп түйіндеді ол.