Bloomberg: Украина мен АҚШ келісімінің тағдыры Путиннің қолында

Сауд Арабиясында өткен Украина мен АҚШ арасындағы келіссөздер нәтижесінде қол жеткізілген 30 күндік атысты тоқтату келісімінің орындалуы енді Ресей президенті Владимир Путинге байланысты, деп хабарлайды POLITICO.KZ Bloomberg басылымына сілтеме жасап.

АҚШ президенті Дональд Трамп Ақ үйде журналистерге: «Украина келісімін берді, енді Путин де келіссе жақсы болар еді. Танго үшін екі адам керек», – деді.

Украина үшін бұл келісім Трамптың қолдауын қайта қайтаруға мүмкіндік берді. RAND зерттеу орталығының аға саясаттанушысы Сэмюэл Чараптың айтуынша, бұл украиналықтар тарапынан өте ақылды дипломатиялық қадам болды.

«Украина осылайша Ресейді қиын таңдау алдында қалдырды: олар бұл келісімді не қабылдайды, не Трамптың ашуын туғызады», – деді Чарап.

АҚШ-тың бұрынғы Украинадағы елшісі, Атлантикалық кеңестің аға директоры Джон Хербст Путин бұл ұсынысты толық қабылдаудың орнына, оған жаңа шарттар қоятынын болжап отыр. Оның айтуынша, Ресей Украина мен оның Еуропалық серіктестері үшін орындалмайтын талаптар қоюы мүмкін.

Bloomberg агенттігі АҚШ-тың арнайы өкілі Стив Виткоффтың Мәскеуде Путинмен кездесуі жоспарланып отырғанын хабарлады. Путиннің келісімге келуі үшін оған Трамппен жоғары деңгейдегі кездесу ұсынылуы ықтимал.

Ресей тарапы әзірге АҚШ пен Украина арасындағы келісімге ресми реакция білдірген жоқ. Кремльге кеңес беретін Сыртқы және қорғаныс саясаты кеңесінің төрағасы Фёдор Лукьянов бұл ұсыныстың Ресей үшін қанағаттанарлық емес екенін айтты.

«Біз тұрақты бейбітшіліктің нақты шарттары келіспейінше, уақытша бітім болмайды деп бірнеше рет айтқанбыз. Бұл ұсыныста нақты шарттар жоқ, бәрін кейін келісу керек», – деді Лукьянов.