Марко Рубио: Егер соғысты тоқтату мүмкін болмаса, АҚШ ары қарай кетуі керек

АҚШ Мемлекеттік хатшысы Марко Рубио Украинадағы соғысты тоқтату мүмкін болмаса, Америка Құрама Штаттары бұл бағыттағы күш-жігерін доғарып, «алға жылжуы» тиіс екенін мәлімдеді, деп хабарлайды POLITICO.KZ CNN дерегіне сүйене отырып.

— Егер Украинадағы соғысты тоқтата алмасақ, онда біз алға жылжуымыз керек... Бұл – біздің соғыс емес. Біз оны бастаған жоқпыз. АҚШ соңғы үш жыл бойы Украинаға көмектесіп келді және біз бұл соғыстың аяқталғанын қалаймыз, бірақ бұл – біздің соғысымыз емес, — деді Рубио Парижден ұшар алдында журналистерге.

Оның айтуынша, Президент Дональд Трамп 87 күн бойы соғысты тоқтатуға тырысқан және қазір бұл үдерістің болашағына қатысты нақты шешім қабылдау қажет болып тұр.

— Бізге жақын күндері, нақты айтқанда, бірнеше күн ішінде бұл мүмкін бе, жоқ па — соны анықтау қажет. Егер тараптар келісімге келуден тым алыс болса, онда Президент мұны доғару керек деп шешуі мүмкін, — деді Рубио.

Мемлекеттік хатшының бұл мәлімдемесі оның және АҚШ-тың арнайы өкілі Стив Уиткоффтың еуропалық және украиналық серіктестермен кездескен күннің ертесіне жарияланды.

АҚШ әзірлеген бейбіт жоспар жобасы келіссөздерде «үміт сыйлайтын қабылдауға» ие болған. Алайда Мемлекеттік департамент жоспардың нақты мазмұнын ашпаған.

Сонымен қатар, Рубио Ресей Сыртқы істер министрі Сергей Лавровпен телефон арқылы сөйлесіп, аталған жоспар жобасын ұсынған.

Жұма күні сөйлеген сөзінде Рубио мен Уиткофф Парижге соғысты тоқтату үшін нақты қандай қадамдар қажет екенін талқылау мақсатында келгенін атап өтті.

— Егер бұл мүмкін болмаса, егер біз бір-бірімізден тым алыстап кеткен болсақ, онда Президент бұл үдерісті аяқтаған жөн деген шешімге келуі мүмкін, — деді Рубио.