«Өзімді қорғадым»: Танысын пышақтап өлтірген Орал тұрғынына сот үкімі шықты

Орал қаласының тұрғыны танысына пышақпен бірнеше рет жарақат салып, ауыр зиян келтіргені үшін 5 жылға бас бостандығынан айырылды, деп хабарлайды Politico.kz.

Ер адам сотта өзін-өзі қорғағанын айтқанымен, кассациялық сот оның уәжін негізсіз деп таныды.

Сот материалдарына сәйкес, оқиға Г. есімді азаматтың пәтерінде болған. Ол бұрыннан таныс К. есімді ер адаммен жанжалдасып қалған. Қақтығыс кезінде Г. жәбірленушіге кемінде 10 рет пышақ сұққан.

Пышақ жарақаттары жәбірленушінің басы, кеуде тұсы, іші, арқасы және санына тиген. Салдарынан К. бірнеше жарақат алып, өміріне қауіп төндіретін қан кетуге ұшыраған. Сот-медициналық сараптама оның денсаулығына келген зиянды өмірге қауіпті ауыр зиян деп бағалаған.

Бірінші сатыдағы сот Г.-ны ҚР Қылмыстық кодексінің 106-бабының 1-бөлігі бойынша кінәлі деп танып, 5 жылға бас бостандығынан айырды. Апелляциялық сот та бұл үкімді өзгеріссіз қалдырды.

Г. сот шешімімен келіспей, кассациялық шағым түсірген. Оның айтуынша, жанжалды К. бастаған және алдымен оған пышақпен шабуыл жасаған. Сотталушы пышақты қарсыласынан тартып алып, кейін өзін қорғау үшін бірнеше рет соққы жасағанын мәлімдеді.

Алайда кассациялық сот бұл нұсқаны растайтын дәлелдер таппаған.

Сот анықтағандай, оқиға кезінде Г. мас күйінде болған. Ол жәбірленушіге кемінде 10 рет пышақ сұғып, оның ішінде өмірлік маңызды ағзалар орналасқан тұстарын жаралаған. Сонымен қатар іс материалдарында К.-ның Г.-ға қарсылық көрсеткені немесе оған қауіп төндіргені дәлелденбеген.

Оқиға орнын тексеру кезінде пәтерден пышақ пен қан іздері табылған. Жәбірленушінің көрсетулері сараптама қорытындыларымен, куәгерлердің айғақтарымен және оқиға орнындағы дәлелдермен сәйкес келген.

Осыған байланысты кассациялық сот Г.-ның әрекетін қажетті қорғаныс деп тануға негіз жоқ деген қорытындыға келді.

Нәтижесінде сот ҚР Қылмыстық кодексінің 106-бабының 1-бөлігі бойынша шығарылған үкімнің заңдылығын растады. Ер адам 5 жылға бас бостандығынан айыру жазасын өтейтін болады.