Павлодар облысында жер үй өртеніп, балалар көз жұмды

Павлодар облысындағы Ертіс ауылында жер үйде болған өрттен кәмелетке толмаған екі бала көз жұмды, деп хабарлайды Politico.kz.

Тілсіз жау туралы хабар «101» қызметіне бүгін таңғы сағат 08:33-те түскен. Өрт сөндірушілер оқиға орнына үш минутта жеткен. Олар келген кезде жер үй толығымен отқа оранған: жиһаз, тұрмыстық заттар мен шатыр жанып, қою түтін шыққан.

«Қиын жағдайға қарамастан, өрт сөндірушілер алғашқы минуттардан-ақ зардап шеккендерді іздеуге кірісті. Олар кәмелетке толмаған үш баланы құтқарып, жедел жәрдем бригадасына тапсырған. Тағы бір бала өрт сөндірушілер келгенге дейін құтқарылған. Алайда, өкінішке қарай, екі бала ауруханада көз жұмды», – деп хабарлады облыстық ТЖД-ның баспасөз қызметі.

Жалын 50 шаршы метр аумақты шарпыған. Өрттің шығу себебі анықталып жатыр.

Павлодар облысы Қайғылы жағдай Өрт