Петропавлдағы өрттің салдары: көпқабатты үйдің қазіргі жағдайы

Петропавл қаласындағы көпқабатты тұрғын үйде өрттен кейін жағдай тұрақталды, деп хабарлайды POLITICO.KZ.

Өрт 11 қаңтар күні кешкі уақытта бірінші қабаттағы азық-түлік дүкенінен басталып, жоғары қабаттарға тараған. Төтенше жағдай қызметкерлері 68 тұрғынды, оның ішінде 18 баланы эвакуациялады.

Өртті сөндіруге бірнеше сағат кетті. Тілсіз жаумен күреске 70-ке жуық өрт сөндіруші мен 18 техника жұмылдырылды. Өрт сөндірілгенімен, зардап шеккен үйдің қазіргі жағдайы тұрғындарды алаңдатып отыр.

Қазіргі уақытта оқиға орнында өрттің себебін анықтау үшін зерттеу жұмыстары жүргізілуде. Полицияның жедел-тергеу тобы және өртті зерттеу зертханасының мамандары үйдің құрылымына зақым келтірілгенін тексеруде.

Төтенше жағдай департаментінің мәліметінше, өрттен ешкім зардап шеккен жоқ. Жарақат алғандар немесе қаза болғандар тіркелмеді.