Қарағандыда сот қол-аяғы жоқ мүгедекті 9 жыл құлдықта ұстағандардың жазасын жеңілдетті

Қарағанды облыстық апелляциялық соты он жылға жуық уақыт бойы дәрменсіз жанды аяусыз қанаған қылмыстық топ мүшелеріне шығарылған үкімді жеңілдеткен, деп хабарлайды Politico.kz.

Бұл туралы өздерінің жанайқайын жеткізген жәбірленушілер президентке арнап жариялаған бейнеүндеуінде айтылған.

Сот қылмыскерлерді аяды ма?

Жәбірленуші ерлі-зайыптылардың айтуынша, апелляциялық сот алқасы істен ұйымдасқан қылмыстық топ құру туралы бапты алып тастап, айыпталушыларға тағайындалған жаза мерзімдерін қысқартқан.

«Осының бәрін ұйымдастырған қылмыскерлер 2025 жылдың мамырында лайықты жазасын алған еді. Алайда кейін, 2025 жылдың желтоқсанында апелляциялық сот олардың бәріне ең аз мерзімдер тағайындады. Неліктен сот оларды аяп, бізді аямады? Қазір біз өз өміріміз бен жалғыз қызымыздың тағдыры үшін алаңдаймыз», – дейді әйел бейнеүндеуде.

Бірінші сатыдағы сот қатаң үкім шығарған

Бұған дейін Қарағанды облысының қылмыстық істер жөніндегі мамандандырылған ауданаралық соты төрт айыпталушыны (Б., Г., В. және Х.-ны) толық кінәлі деп тапты.

Содан кейін ұйымдастырушы Б. қауіпті қылмысты қайта жасағаны үшін 17 жылға бас бостандығынан айырылды, ал оның үш сыбайласы адам саудасы және қатыгез қанау үшін 12 жылдан бас бостандығынан айырылды.

Тергеу материалдарына сәйкес, бұл қылмыстық жүйе 2015 жылдың қаңтарынан бері жұмыс істеп келген. Қылмыстық топтың жетекшісі Б. Қарағандыдағы ЦУМ маңында қайыр сұрап жүрген М. мен оның азаматтық жұбайы Л.-ны байқайды. Л.-ның қол-аяғы болмаған.

Қорқыту мен күш қолдану арқылы Б. оларды өзіне тәуелді етіп, жұмыс істеуге мәжбүрлеген. Әйел күн сайын Л.-ны «45-квартал» аялдамасына апарып, қайыр сұратқан. Күніне жиналатын 20–40 мың теңге көлеміндегі қаражат түгелдей қылмыстық топ жетекшісіне беріліп отырған.

Ұйымдасқан қылмыстық топ қалай құрылды?

2020 жылы ерлі-зайыптылардың қызы дүниеге келген. Алайда Б. баланың туу туралы куәлігін тартып алып, нәрестені өз қарындасының қарауына беруге мәжбүрлеген. Осылайша ол баланы ата-анасына қысым көрсету құралына айналдырып, кез келген қарсылық үшін ата-ана құқығынан айырумен қорқытқан.

Қолы- аяғы жоқ адамның есебінен табыс табуға құрылған бұл «қатыгез бизнес» Б. 2023 жылдың соңында басқа қылмыс бойынша қамауға алынғаннан кейін де тоқтамаған.

Тергеу изоляторында отырған кезінде ол ұялы телефон тауып алып, өзінің жиені В.-ны, оның азаматтық некедегі жұбайы Г.-ны және танысы Х.-ны тарта отырып ұйымдасқан қылмыстық топ құрған.

Топтың жаңа мүшелері де мүгедек азаматты күшпен көшеге шығарып, қайыр сұратуды жалғастырған. Жиналған ақша тергеу изоляторынан берілген нұсқауларға сәйкес жұмсалып отырған: жиенінің автонесиесін төлеуге, топ мүшелерінің жеке қажеттіліктерін өтеуге және қылмыстық топ жетекшісінің тұрмыстық сұраныстарын орындауға бағытталған.