Қазақша қызмет көрсетуден бас тартқан қызметкер жұмыстан босатылды
Алматыдағы Gusto мейрамханасы 21 желтоқсанда орын алған жағдайға қатысты ішкі тексеру жұмыстарының аяқталғанын мәлімдеді, деп хабарлайды Politico.kz Aikyn.kz-ке сілтеме жасап.
Мейрамхана таратқан ресми мәлімдемеге сәйкес, тексеру қорытындысы бойынша сервис стандарттары мен корпоративтік коммуникация талаптарын бұзуға жол берген мейрамхана әкімшісінің қызметін тоқтату туралы басқарушылық шешім қабылданған.
«Аталған шешім тек ішкі тәртіптік шара болып табылады және оқиғаға қатысы бар тұлғалардың әрекеттеріне құқықтық баға беруді көздемейді. Оқиғаға байланысты одан әрі қарау заңнамада белгіленген тәртіппен тараптардың өзара қатысуымен жүзеге асырылып жатыр», – делінген хабарламада.
Мейрамхана өкілдері қонақтармен қарым-қатынаста сыйластық пен әдептілікті басты қағидат ретінде ұстанатынын атап өтті. Қандай жағдай болмасын, дөрекі немесе орынсыз сөйлеуге жол берілмейтіні және мұндай әрекеттердің сервис стандарттарына қайшы екені баса айтылған. Осыған байланысты ішкі регламенттер күшейтіліп, қызметкерлермен қосымша түсіндіру жұмыстары жүргізілетіні хабарланды.
Сондай-ақ мәлімдемеде Gusto мейрамханасының Қазақстан Республикасының мемлекеттік тілін құрметтейтіні және қонақтарға қазақ, орыс және ағылшын тілдерінде қызмет көрсететіні көрсетілген.
«Орын алған жағдайдың қоғамда теріс пікір тудырғанына өкініш білдіреміз. Көрсеткен түсіністік пен кері байланыс үшін қонақтарымызға алғыс айтамыз», – деп түйінделеді мәлімдемеде.
Соңғы жаңалықтар
