Қазақстанда жаңа теміржолдар мен әуежайлар салынады

Үкіметтің кеңейтілген отырысында премьер-министр Олжас Бектенов көлік және логистика саласын дамытуға бағытталған ауқымды жобаларды жариялады, деп хабарлайды POLITICO.KZ.

Биыл Достық – Мойынты және Алматы айналма теміржолдары құрылысы аяқталады. Сонымен қатар, Дарбаза – Мақтаарал және Бақты – Аягөз бағытындағы теміржол магистральдарының құрылысы жалғасып жатыр. Алдағы уақытта Мойынты – Қызылжар теміржол желісін салу және Алтынкөл – Жетіген учаскесінде қосымша жолдарды жүргізу жоспарлануда.

Сондай-ақ, үкімет үш жаңа әуежай салуды қолға алды. Олар Катонқарағай, Зайсан және Кіндерлі аймақтарында туризмді дамытуға бағытталған. Ақтауда аэрохаб құру жобасы да қарастырылып жатыр.

Бұдан бөлек, премьер-министр Каспий теңізінің түбі арқылы оптикалық-талшықты байланыс желісін салу жобасының басталатынын мәлімдеді. Бұл Қазақстанның байланыс және цифрлық инфрақұрылымын нығайтуға мүмкіндік береді.