Қазақстандағы жеке мектептер 80 млрд теңгеге мұқтаж

Қазақстандағы жеке мектептер мемлекеттік қаржыландырудан 80 миллиард теңгеге жуық қаражат жетіспеушілігінен зардап шегуде. Бұл туралы Мәжіліс депутаты және бұрынғы Оқу-ағарту министрі Асхат Аймағамбетов мәлімдеді, деп хабарлайды POLITICO.KZ.

Аймағамбетовтың айтуынша, жеке мектептерге қаражат "үлкен кідірістермен" бөлінеді, ал кейбір оқу орындары соңғы екі жылдағы қаржыландыруды әлі алмаған.

«Биыл жағдай одан сайын қиындауы мүмкін. Жеке мектептерді қаржыландыру республикалық бюджеттен жергілікті бюджетке ауыстырылды. Бірақ барлық әкімдіктер бұл өзгеріс туралы білмейді және жеткілікті қаржы бөлген жоқ. Алдын ала есептеулер бойынша тапшылық шамамен 80 миллиард теңгені құрайды», – деді депутат.

Депутат атап өткендей, соңғы жылдары жеке мектептер саны 30-дан 800-ге дейін артты. Бұл өсім мемлекеттік тапсырыс пен жан басына шаққандағы қаржыландырудың тиімді механизмдері арқасында мүмкін болды.

«Алайда қазір жеке мектептердің дамуы үлкен қауіп алдында тұр. Әсіресе, ата-аналардан қосымша қаржы алмай, тек мемлекеттік тапсырыс бойынша жұмыс істейтін мектептер банкрот болу алдында», – деп ескертті Аймағамбетов.