Қазақстандық оқушылар үй тапсырмасын ChatGPT көмегімен орындап жатыр

Қазақстанда оқушылар жасанды интеллектті, соның ішінде ChatGPT-ны, үй тапсырмалары мен бақылау жұмыстарын орындауға пайдаланып жүр, деп хабарлайды POLITICO.KZ.

Бұл мәселеге қатысты ҚР Цифрлық даму, инновациялар және аэроғарыш өнеркәсібі вице-министрі Дмитрий Мун пікір білдірді.

"Бұл мәселе тек Қазақстанда ғана емес, бүкіл әлемде бар. GPT және басқа да құралдар арқылы жасалған мәтіндерді тексеретін арнайы сервистер бар. Дегенмен, ең маңыздысы – ата-аналар балаларының оқуына жауапкершілікпен қарауы керек. Мен өзім ата-ана ретінде баламның үй тапсырмасын орындауын мұқият бақылап отырамын. Оған техникаға толықтай сеніп тапсырғаннан гөрі өз бетімен ізденгені дұрыс", – деді вице-министр.

Министрлік өкілі жасанды интеллектті мүлдем пайдалануға тыйым салу мүмкін емес екенін атап өтті. Сондықтан Қазақстанда жаңа мемлекеттік білім беру стандарты енгізіліп, әрбір пәнге жасанды интеллектке негізделген технологиялар интеграциялануда.

"Мысалы, биология, химия және физика сабақтарында виртуалды зертханалар қолданылады. Тіл пәндерінде – диалог жүргізуге арналған қосымшалар, ал географияда – ақпараттық жүйелер енгізіледі. Бұл оқушылардың цифрлық дағдыларын дамытуға көмектеседі", – деп түсіндірді Мун.

Сарапшылардың пікірінше, жасанды интеллект құралдарын білім беруде тиімді пайдалану маңызды. Алайда, олардың бақылау жұмыстарында немесе емтихандарда әділетсіздікке әкелмеуі үшін қосымша реттеу шаралары қажет болуы мүмкін.