Қызылордада экс-футболшы командаласын өлтірген үшін сотталды

Қызылордада Ержан Маликов ұзақ мерзімге сотталды.

Бұл туралы  qostanay.tv ratel.kz cайтына сілтеме жасап хабарлайды.

Қызылорда қаласында 1989 жылы туған Ержан Маликов ауыр қылмыс жасағаны үшін ұзақ мерзімге бас бостандығынан айырылды. Ол 34 жастағы Олжас Алтаевты қасақана өлтіргені үшін кінәлі деп танылды.

Қайғылы оқиға қалай болды?

Бұл оқиға 1 маусым күні түн ортасында Қызылордадағы Досжохин көшесінде орналасқан Алтаевтың жеке үйінде орын алды.

Тергеу барысында анықталғандай, достар бастапқыда бейбіт жағдайда сыра ішіп, теледидардан футбол матчын тамашалаған. Алайда кейін екеуінің арасында жанжал туындап, оның соңы қайғылы жағдаймен аяқталған. Маликов жанжал барысында Алтаевтың оң жақ мойнына пышақ сұғып алған. Жарақаттанған артериялар мен тамырлар қатты қансырап, Алтаев оқиға орнында көз жұмды.

Маликовтың соттағы жауабы

Сот отырысында Ержан Маликов бұл оқиғаға қатысты өзінің нұсқасын ұсынды. Оның айтуынша, сол күні мектепаралық футбол турнирі өткен, оған Алтаев пен Маликов өз шәкірттерін алып келген. Екеуі де – кәсіби футболмен қош айтысқаннан кейін дене шынықтыру мұғалімі және футбол жаттықтырушысы ретінде жұмыс істеп жүрген.

Турнирден кейін олар демалу үшін бірге тамақтануға барған. Кейін Алтаевтың шақыруымен оның үйіне барады. Маликовтың айтуынша, үйде теледидар алдында Алтаев күшті ішімдіктер ішуді жалғастырған, ал өзі ішуден бас тартқан. Маликовтың сөзіне қарағанда, дәл осы сәттен кейін Алтаев ашуға мініп, пышақпен оған шабуыл жасаған.

Маликов өзін қорғауға тырысып, екеуі төбелесе кеткен. Жанжал барысында мас күйдегі Алтаев байқаусызда өз мойнын өзі кесіп алған. Кейін ол үйден жүгіріп шығып, тіпті көшеге дейін жеткен. Ал Маликов үйде қалып, қанын жуып, өз-өзіне келген. Біраз уақыттан соң полиция келіп, оны ұстаған. Сол кезде ғана Маликов досының қайтыс болғанын білген.

Сот шешімі

Қызылорда облысының қылмыстық істер жөніндегі мамандандырылған ауданаралық соты Ержан Маликовты ҚР Қылмыстық кодексінің 99-бабының 1-бөлігі («Кісі өлтіру») бойынша кінәлі деп танып, 10 жылға бас бостандығынан айырды. Ол жазасын орташа қауіпсіздік деңгейіндегі мекемеде өтейді. Сондай-ақ, сот марқұмның туыстарына 10 миллион теңге көлемінде моральдық өтемақы төлеуді міндеттеді.

Маликов сот үкімімен келіспей, оны қайта қарауды сұрады. Ол өз кінәсін мойындамай, тіпті пышақты қолына алмағанын айтты. Адвокатымен бірге істі 106-баптың 3-бөлігіне («Денсаулыққа қасақана ауыр зиян келтіру, абайсызда өлімге әкеп соқтыру») ауыстыруды және жазаны жеңілдетуді сұрады. Өйткені ол төрт баланың жалғыз асыраушысы екенін алға тартты. Алайда Қызылорда облыстық сотының қылмыстық істер жөніндегі алқасы өтінішті қанағаттандырмай, алғашқы үкімді күшінде қалдырды.