Қызылордада іріктеуден өткен жастарға «Дала Қырандары» төсбелгісі табысталды

Қызылордада «Дала Қырандары» қозғалысына жаңа мүшелерді қабылдау рәсімі өтті. Іріктеудің барлық кезеңінен сүрінбей өткен үміткерлерге салтанатты түрде арнайы төсбелгілер табысталды, деп хабарлайды POLITICO саяси-әлеуметтік порталы.

«Қыран» атағына ие болу үшін үміткерлер бірнеше кезеңнен тұратын күрделі сынақтан өткен. Ұйымдастырушылардың айтуынша, бұл кезеңдер тек күш пен жылдамдықты ғана емес, сонымен қатар үміткердің тәртібін, мінез-құлқын және ішкі жігерін сынауға бағытталған. Болашақ «қырандар» 3000 метрге жүгіріп, Купер тестін тапсырған.

Физикалық сынақтардан бөлек, олар ұйымның жарғысы бойынша арнайы емтиханнан өтіп, үйлестірушілермен жеке сұхбаттасу арқылы да іріктелген.

Достық әрі іскерлік ахуалда өткен төсбелгіні табыстау рәсімі – үміткерлердің ұзақ дайындығының жемісін көрсетті. Тәжірибелі «қырандар» қызылордалық команданың жоғары дайындық деңгейін және ерекше бірлігін атап өтті.

«Әрбір төсбелгі — сенімнің белгісі. Бұл жастар нағыз қыран атағына лайық екенін дәлелдеді», — деді ұйымдастырушылар.

Осылайша, Қызылорда «Дала Қырандары» қозғалысы қарқынды дамып келе жатқан өңірлердің қатарына ресми түрде қосылды.