Салық реформасы бағаның күрт өсуіне алып келді

Салық реформасы бағаның өсуіне алып келді, деп хабарлайды POLITICO.KZ Злобная татешка арнасына сілтеме жасап.

Алматыда мемлекеттік органдардың өкілдері, кәсіпкерлер, экономистер, бухгалтерлер мен заңгерлер қатысқан ауқымды Салық форумы өтті.

Форум қорытындысы бойынша сарапшылар салық реформасының қажеттілігін мойындағанымен, оның азық-түлік, тауарлар мен қызмет бағасының күрт өсуіне және ЖІӨ өсімінің баяулауына әкелетінін атап өтті.

Қазіргі уақытта коммерциялық сектор қосылған құн салығын (ҚҚС) жылдық айналымы 78,6 млн теңгеден асқан жағдайда төлейді. Ал арнайы салық режиміндегі (АСР) айналымы 2,4 млрд теңгеден асқан кәсіпорындар да ҚҚС төлеуші болып табылады.

Жаңа Салық кодексі қабылданған соң, жалпыға бірдей режимде (ЖБР) ҚҚС тіркеу шегі 40 млн теңгеге дейін төмендейді. Сонымен қатар, бөлшек салық режимі алынып тасталады, АСР-ға рұқсат етілген қызмет түрлері қысқарып, салық ставкасы 12%-дан 16%-ға дейін өседі.

Сарапшылардың айтуынша, негізгі мәселе — шекті мөлшер мен ставканың бір уақытта өзгеруі. Егер бұл өзгерістер біртіндеп енгізілсе, реформа жеңілірек өтетін еді.

Форум спикері, бухгалтер Анастасия Макова:
«Қазірдің өзінде реформаны күту салдарынан баға өсіп жатыр. ҚҚС шегі мен ставканың көтерілуі барлық қызмет пен тауар құнына әсер етеді. Тіпті, «көршілес дүкендерге» де бұл өзгеріс тиеді», – деді.

Қарағандылық аудитор Айжан Балакешова банк қызметтеріне ҚҚС енгізілсе, бұл да тұтынушыларға ауыртпалық түсіретінін айтты:
«Банктер шығынға жұмыс істемейді. Егер банк қызметтері 16%-ға қымбаттаса, кәсіпкерлер де өз бағаларын өсіреді», – деді ол.

Бұл реформалар жанама салықтардың жалпы өсіміне және бағаның фронталды көтерілуіне әкелмек. Шенеуніктер ашықтық туралы айтқанымен, зардапты қарапайым халық пен салықты тұтынушыға аударуға мәжбүр болатын шағын және орта бизнес көреді.

Банктік операцияларға ҚҚС енгізу және корпоративтік табыс салығын (КТС) 20%-дан 25%-ға көтеру де бағаның өсуін жеделдетуі мүмкін.

Сонымен қатар, АСР үшін тыйым салынған қызмет түрлері енгізілмек. Кәсіпкерлер құрылыс пен логистика сияқты баға қалыптастыруға әсер ететін салалардың бұл тізімге енуінен қауіптенеді. «Жеңілдетілген режимде» жұмыс істейтіндер үшін B2B форматы алынып тасталады.

Салықтық реформаның көлеңкелі бизнесті жою мақсаты құптарлық болғанымен, жаңа Кодекске енгізілген бірқатар шаралар экономиканы әлсіретуі мүмкін.

Сарапшылар реформаны қайта қарау қажеттігін айтуда. Әйтпесе, бұл өзгерістер экономикалық өсімді тежеп, жұмыссыздықтың артуына себеп болуы мүмкін.