Шымкентте жанармай құю бекетінде көлік жанып, бірнеше адам зардап шекті

Шымкенттегі жанармай құю бекетінде көлік өртке оранып, төрт адам зардап шекті, деп хабарлайды Politico.kz.

Оқиға Сайрам ауданындағы Абдула-Абад көшесінде орналасқан жанармай құю бекетінде болған. 

Видеодан ер адамның ыдысқа бензин құйып алып, оны көліктің салонына кіргізгенін көруге болады. Арада бірнеше минут өткенде автокөлік кенеттен отқа оранған.

Өрт тұтанған сәтте көліктің ішінде төрт адам болған. 

Абырой болғанда, олардың барлығы салоннан өз бетімен шығып үлгерген.

Зардап шеккен екі адам ауыр термиялық күйікпен ауруханаға жатқызылды. Дәрігерлердің айтуынша, олардың денесінің шамамен 70 пайызын күйік шалған. Тағы екі адамға медициналық көмек оқиға орнында көрсетілді.

Қазір оқиғаның нақты себептері мен мән-жайы анықталып жатыр.