Шымкентте жоғары шенді полицей ірі көлемдегі парамен қолға түсті

Шымкент шаһарында құқық қорғау саласының лауазымды тұлғасы жемқорлық күдігімен құрықталды деген ақпарат тарады, деп хабарлайды Politico.kz

Бұл туралы белгілі журналист Михаил Козачков өзінің «Kozachkov offside» Telegram-арнасында мәлімдеді. Дереккөздің хабарлауынша, Ұлттық қауіпсіздік комитетінің арнайы жасағы жүргізген шұғыл операция барысында Шымкент қаласы Әл-Фараби аудандық полиция басқармасының тізгінін ұстаған полковник 20 миллион теңге көлемінде пара алып жатқан сәтінде әшкереленген.

Ресми ашық дереккөздердегі мәліметтерге сүйенсек, аталған басқарма басшысы лауазымын қазіргі таңда полиция полковнигі Батыр Мырзагелдиев атқарып келеді.

Осы оқиғаға қатысты редакциямыз Ұлттық қауіпсіздік комитетіне ресми сауал жолдады. Әзірге құзырлы органнан нақты жауап немесе ресми түсініктеме түскен жоқ.

Айта кетерлігі, полковник көпшілік алдына соңғы рет биылғы жылдың 13 наурызында шыққан екен. Сол жолы шенді қызметкер жүзге жуық жергілікті тұрғынмен жүздесіп, халықтың мұң-мұқтажын тыңдаған болатын. Жиын соңында Батыр Мырзагелдиев азаматтар тарапынан түскен әрбір ұсыныс пен талап-тілек назардан тыс қалмайтынын айтып, мәселелерді шешуге уәде берген еді.