Түркия мектебінде тағы да атыс болды: Қаза тапқандар саны 9-ға жетті

Түркияның Кахраманмараш қаласындағы мектепте болған қарулы шабуыл салдарынан қаза тапқандар саны 9 адамға жетті, деп хабарлайды Politico.kz.

Олардың сегізі – оқушылар, біреуі – мұғалім. Елдің Ішкі істер министрлігінің мәліметінше, оқиға салдарынан тағы 13 адам жарақат алып, ауруханаға жеткізілген. Зардап шеккендердің алтауы ауыр жағдайда жатыр.

Алдын ала ақпарат бойынша, атыс орта мектептердің бірінде болған. Оқиға орнына бірден полиция мен жедел қызметтер жіберіліп, жараланғандарға көмек көрсетілген. Тергеу барысында шабуыл жасаған адамның осы мектептің 8-сынып оқушысы екені анықталған. Мәліметтерге сәйкес, ол оқиға орнында көз жұмған. Сондай-ақ қарудың оның әкесіне тиесілі болуы мүмкін екені айтылуда. Қазіргі таңда күдіктінің әкесі ұсталып, тергеу амалдары жүргізілуде.

Оқиғадан кейін Түркия билігі Кахраманмараш провинциясында болған қайғылы жағдайға қатысты ресми емес ақпарат таратуды уақытша шектеді. Әділет министрлігі мен тергеу органдары оқиға орнында жұмыс істеп жатыр.

Айта кетейік, бұл Түркияда соңғы күндері білім беру мекемесінде тіркелген екінші қарулы шабуыл. Бұған дейін Шанлыурфа провинциясында да осындай оқиға болып, 16 адам жараланған еді.