Зеленский Харьковте әскери кеңес өткізді

Украина президенті Владимир Зеленский сенбі күні Донецк облысына сапармен барып, жауынгерлермен кездесті, деп хабарлайды POLITICO.KZ.

Президент кеңсесі сапар барысында түсірілген видеоны жариялады. Зеленский Покровск тактикалық тобының командалық пунктінде болып, әскери басшылардың есептерін тыңдады. Ол бірқатар жауынгерлерді ордендермен марапаттап, майданда қаза тапқан азаматтарға арналған мемориалға барып, құрмет білдірді.

Бұдан кейін Зеленский Харьковқа аттанып, әскери кабинет кеңесін өткізді. Онда майдандағы қазіргі жағдай, Запорожье, Донецк, Харьков және Сумы–Курск облыстарындағы операциялардың барысы кеңінен талқыланды. Сондай-ақ қатысушылар жексенбі күні Сауд Арабиясында өтетін Украина мен АҚШ делегациялары арасындағы келіссөздерге дайындалды.

Бұл келіссөзде атысты ішінара тоқтату, соның ішінде Украина аумағындағы энергетикалық нысандарға шабуылдарды тоқтату мәселесі қарастырылады деп жоспарланған. Келіссөз алдымен Украина мен АҚШ арасында өтіп, кейін АҚШ делегациясы Ресеймен кездеседі деп күтілуде.