Украина Ресей жағында соғысқан 600-ден астам қазақстандықтың тізімін жариялады

Украина Қорғаныс министрлігіне қарасты «Хочу жить» орталығы Ресей жағында соғысқан 661 қазақстандықтың аты-жөнін жариялады, деп хабарлайды POLITICO.KZ АЗАТТЫҚ РАДИОСЫНА сілтеме жасап.

Орталықтың мәліметінше, бұл азаматтар 2022 жылдан бері Ресей армиясы қатарында Украина аумағындағы соғысқа қатысқан. Оның ішінде кемінде 78-і мерт болған. Тізімдегі мәліметтер Ресей әскерінің өз ішіндегі дереккөздерден алынған.

«Қазақстанда жалдамалылық Қылмыстық кодекспен жазаланатынын еске саламыз. Ресей жағында соғысып аман қалғандар елге оралған соң 12 жылдан 17 жылға дейін бас бостандығынан айырылып, мүлкі тәркіленуі мүмкін», – деп мәлімдеді орталық өкілдері.

Олардың сөзінше, Орталық Азия елдерінің азаматтары Ресей әскеріне негізінен үш тәсілмен тартылады: алдау, жоғары жалақы уәде ету және қысым көрсету арқылы.

Бұған дейін Азаттық «Вагнер» жеке әскери тобының Қазақстанда хабарландыру таратып, соғысқа адам тартқанын хабарлаған. Ресей армиясы мен жалдамалы құрылымдар құрамында соғысқан қазақстандықтардың нақты саны белгісіз.

Қазақстанда шетелдегі қарулы қақтығыстарға қатысуға 2014 жылдан бастап заңмен тыйым салынған. Мұндай қылмыс үшін азамат 12 жылдан бастап өмір бойына дейін бас бостандығынан айырылуы мүмкін, мүлкі тәркіленеді, ал кей жағдайда азаматтықтан айыру жазасы да қарастырылған.