Ұлттық қордан алынатын 5 трлн теңге неге жұмсалады – сарапшы түсіндірді

Алдағы үш жылда Қазақстанның инфрақұрылымын дамыту үшін Ұлттық қордан 5 трлн теңге алынады. Экономикалық шолушы Юрий Масанов бұл қаржының қайда жұмсалатынын және оның неліктен тиімді шешім екенін түсіндірді, деп хабарлайды Politico.kz.

2027-2029 жылдарға арналған әлеуметтік-экономикалық даму болжамына сәйкес елдегі құрылыс секторы жылына кемінде 16%-ға өседі. Масановтың сөзіне қарағанда бұл өсім тек тұрғын үй салумен шектелмейді. Басты назар көлік, энергетика және әлеуметтік инфрақұрылымға аударылмақ. Осының арқасында аймақаралық жолдар жақсарып, жылу мен электр қуатын беру тұрақтанады. Сонымен қатар жаңа мектептер мен ауруханалар бой көтереді. Сарапшы халық саны мен кәсіпорындардың көбеюіне байланысты мұндай жобалардың өте маңызды екенін атап өтті.

Ауқымды құрылысты қаржыландырудың бірнеше жолы бар. Біріншісі бюджет қаржысын пайдалануды көздейді. Алайда қазынаға түсетін кіріс шектеулі болғандықтан бұл ұзақ уақытты қажет етеді. Екінші нұсқа шетелден қарыз алуға негізделген. Бірақ бұл жағдайда қарызды өтеу мен оған қызмет көрсету міндеті туындайды. Үшінші жол ретінде Ұлттық қор қаржысын ішінара пайдалану қарастырылған.

Қазіргі уақытта алдағы үш жылда жобаларға мақсатты трансферт ретінде 5 трлн теңге алу жоспарланып отыр. Экономист бұл шешімнің дұрыстығын қорға түсетін кіріс көлемімен түсіндірді. Оның мәліметінше алдағы үш жылда қордан алынатын сомадан әлдеқайда көп ақша түседі. Нақтырақ айтқанда 2027 жылы 5,1 трлн теңге кіріс күтілуде. Ал 2028 жылы бұл көрсеткіш 5,5 трлн теңгеге, 2029 жылы 5,7 трлн теңгеге жетеді. Яғни үш жылда алынатын 5 трлн теңге қордың жалпы түсімінен аспайды.

Масанов инфрақұрылымдық жобалардың нәтижесі тез көрінетінін айтты. Ол адами капиталды дамытып, елдің экономикалық әлеуетін арттыруға тікелей және жанама түрде көмектеседі. Сонымен бірге маман АҚШ долларының да инфляцияға ұшырайтынын еске салды. Сондықтан қаражатты он жылдан кейін емес, қазір жұмсау әлдеқайда көп нысан салуға мүмкіндік береді. Оның айтуынша бір миллион доллардың осыдан он жыл бұрынғы құны мен қазіргі құны екі түрлі.

«Қазіргі уақытта дамыған әрі жақсы инфрақұрылым құру – қалыпты және дұрыс таңдау. Әрине бұл дұрыс бақылау мен қаражатты тиімді жұмсау кезінде ғана мүмкін болады», – деді экономикалық шолушы Юрий Масанов.

Айта кетейік, Ұлттық қордан 5 трлн теңге алынаты жайлы Ұлттық экономика министрі Серік Жұманғарин мәлім еткен еді.