Зайсан көлінде балықшылардың мәйіті табылды

Зайсан көлінде жоғалған екі балықшының денесі табылып, іздестіру жұмыстары аяқталды, деп хабарлайды Politico.kz.

Белгілі болғандай, 22 қыркүйекте Шығыс Қазақстан облысы Күршім ауданы Балықшы ауылдық округінде 1979 және 2001 жылы туған екі ер адам Зайсан көліне балық аулауға шығып, қайтып оралмаған. ТЖМ күштері мен құралдарымен үздіксіз іздестіру жұмыстары ұйымдастырылып, іздеу жұмыстарына жергілікті тұрғындар өз қайықтарымен қатысқан.

«Іздестіру жұмыстарының алғашқы күнінде жағалаудан 3-4 шақырым қашықтықта суға батқан қайық табылды. 29 қыркүйекте жергілікті тұрғындар 2001 жылы туған ер адамның денесін тапты. 30 қыркүйекте құтқарушылар 1979 жылы туған ер адамның денесін судан алып шықты», - деп жазылған хабарламада.

Іздестіру жұмыстары барысында ТЖМ құтқарушылары 63 рет сүңгу жұмыстарын жүргізіп, жағалау сызығы мен көлдің акваториясын, оның ішінде ұшқышсыз ұшу аппараттарын пайдалана отырып, тексерді.

Іздестіру жұмыстарын ауа райының қолайсыздығы, қатты жел мен су бетіндегі толқын, сондай-ақ тексерілетін акватория аумағының үлкен болуы қиындатты. 

Бұл сүңгуірлердің жұмысына және судағы іздестіру топтарының қозғалысына айтарлықтай кедергі келтірді, дейді құтқарушылар.

Еске салайық, 17 қыркүйекте балық аулауға шыққан үш ер адамның қайығы аударылып, олар суға кеткені хабарланған еді. Үшеудің біреуі өз күшімен жүзіп, аман қалған. 1968 және 1995 жылы туған екі балықшының мәйіті бір күннен кейін табылған болатын.