​«Ақша үшін жүр дегенді есту ыңғайсыз»: Олжас Абай Бадықовамен арақатынасы туралы ашық айтты

​Танымал отандық актер Олжас Абай әлеуметтік желіде актриса Дариға Бадықовамен қарым-қатынасы тек ақшаға негізделген деген қауесеттер мен оқырмандардың сын пікірлеріне алғаш рет жауап берді, деп хабарлайды Politico.kz.

​Кино әлеміндегі танымал тандемнің айналасындағы бұл әңгіме желі қолданушылары арасында үлкен талқылау тудырды.

​Олжас Абай өзінің кино индустриясында келе жатқанына көп уақыт болғанын айтып, әріптесі Дариға Бадықованың оның мансабындағы орны ерекше екенін жасырмады:

«Кей адамдар біздің қарым-қатынасты тек ақшаға тіреп қояды. Бірақ менің кино саласында жүргеніме 16 жыл болды. Иә, рас, менің танымалдылығымды берекеге айналдырып, өмірімнің одан әрі табысты болуына себеп болған — Дариға… Біз қазірдің өзінде соңғы төртінші жобамызды бірге түсіріп жатырмыз. Еңбекпен келген табысым өзіме толықтай жеткілікті», – деді актер ағынан жарылып.

​Актер сырт көздің «біреудің есебінен күн көріп жүр» деген мағынадағы сөздерді айтуы өзіне өте ауыр тиетінін және мұндай айыптаулардың қисынсыз екенін атап өтті.

​«Ақша үшін жүр деген сөзді есту мен үшін өте ыңғайсыз. Себебі байлық та, бақ та адамға жайдан-жай аспаннан түспейді. Оның артында жылдар бойғы төгілген тер, үлкен тәуекел, темірдей тәртіп және тума талант тұрады. Сондықтан адамның қалтасына емес, оның жүрегіне, мінезіне және еткен еңбегіне қараған дұрыс», – деп жазды Олжас Абай өзінің желідегі парақшасында.

Бүгінде Олжас Абай мен Дариға Бадықова қазақстандық комедия жанрындағы ең өтімді әрі кассалық жобалардың бел ортасында жүрген сұранысқа ие актерлер болып табылады.