Автобус өзенге құлап, қырықтан аса адам із-түзсіз жоғалып кетті

Батыс Африкадағы Бенин Республикасында жолаушылар автобусы Уэме өзеніне құлап, кемінде бір адам көз жұмды. 44 жолаушы із-түзсіз жоғалған.

Бұл туралы жергілікті Banouto басылымы жазды.

Ресми деректерге сәйкес, автобус Того астанасы Ломе қаласынан Нигер астанасы Ниамейге бағыт алған. Жол бойында жүргізуші көлік тізгінін басқара алмай қалып, автобус трассадан шығып, өзенге құлаған.

Автобуста Мали азаматтары да болғаны белгілі болды. Алдын ала ақпарат бойынша, бір адам қаза тапқан, тоғыз жолаушы құтқарылды. Тағы 44 адамның тағдыры әзірге белгісіз.

Құтқарушылардың хабарлауынша, автобус әлі де су астында, ішінде адамдар болуы мүмкін. Қазір оқиға орнында Бениннің арнайы қызметтері іздестіру-құтқару жұмыстарын жалғастырып жатыр.