Елімізде 28 адамның есімі – Қазақстан

Елімізде "Қазақстан" есімді 28 азамат тұрады, деп хабарлайды POLITICO.KZ.

Қазақстан Республикасы Стратегиялық жоспарлау және реформалар агенттігінің Ұлттық статистика бюросы ерекше есімдерге қатысты ресми статистикасын жариялады. Бүгінгі таңда елімізде өз Отанының құрметіне Қазақстан деп аталған 28 азамат тұрады.

Бюроның ресми мәліметінше, бұл сирек есім иелері еліміздің әр өңірінде кездеседі. Олардың басым бөлігі Қарағанды - 7 адам және Ақмола - 6 адам облыстарында шоғырланған.

Басқа өңірлердегі таралуы келесідей:

• Қостанай облысы мен Астана қаласында – 3 азаматтан;
• Алматы, Маңғыстау облыстарында және Шымкент қаласында – 2 адамнан;
• Ақтөбе, Батыс Қазақстан және Павлодар облыстарында – бір-бір азаматтан.

Бір қызығы, осы 28 адамның ішінде тек бір ғана әйел азаматшаның есімі Қазақстан деп тіркелген.

Жас ерекшеліктеріне келетін болсақ, ең қарт Қазақстанның жасы – 92-де, ал ең жасы – 25-те.