Маңғыстаудағы әскерилердің өлімі: 8 лауазымды тұлға қамауда, тергеу аяқталуға жақын
Әскери қызметшілердің қазасына қатысты тергеуді Бас прокуратура өз бақылауына алды, деп хабарлайды Politico.kz.
Маңғыстау облысында оқу-жаттығу кезінде әскери қызметшілердің қаза табу дерегі бойынша қылмыстық істі тергеу жалғасып жатыр. Қадағалаушы органның мәліметінше, істің барысы Бас прокуратураның ерекше бақылауында.
Қазіргі уақытта Ішкі істер министрлігінің әскери-тергеу органдары қайғылы оқиғаның мән-жайын анықтау мақсатында кешенді жұмыстар жүргізуде. Тергеу аясында:
- 300-ден астам адамнан жауап алынды;
- 30-дан астам сот сараптамасы мен зерттеу қорытындыланды.
Бұған дейін қызметке салғырт қарау және кеме жүргізу қағидаларын бұзу күдігімен сот санкциясы бойынша 8 лауазымды тұлға қамауға алынған болатын. Олардың қатарында:
- Қарулы Күштердің Әскери-теңіз күштерінің бас қолбасшысы;
- Бас қолбасшының бірінші орынбасары және жауынгерлік даярлық жөніндегі орынбасары;
- Екі әскери бөлімнің командирлері;
- Теңіз жаяу әскері батальоны мен ротасының командирлері;
- Катер капитаны бар.
Ведомство таяу күндері негізгі тергеу әрекеттері аяқталып, іске қатысушылар ресми құжаттармен таныса бастайтынын хабарлады. Қылмыстық-процестік кодекстің 201-бабына сәйкес, сотқа дейінгі тергеп-тексерудің қалған деректері жария етуге жатпайды.
Соңғы жаңалықтар
