Мобильді аударымдарға қатысты жаңа ереже күшіне енеді

8 қарашадан бастап Қазақстанда мобильді аударымдарды тексерудің жаңа тәртібі күшіне енеді. Енді салық органдарының назарына ілігуі мүмкін ақша аударымдарының шекті сомасы 1 миллион 20 мың теңгеден 1 миллион 557 мың теңгеге дейін өседі. Жаңа талап қазан айында түскен аударымдарға да қолданылады, деп хабарлайды Politico.kz.

Бұл туралы Мемлекеттік кірістер комитеті Tengrinews.kz басылымының ресми сауалына берген жауабында хабарлады.

Бұған дейін мобильді аударымдарды бақылаудағы шекті сома ең төменгі жалақының 12 еселенген мөлшерімен есептелетін. Енді бұл көрсеткіш 360 айлық есептік көрсеткішке (АЕК) теңестірілді.

Қаржы министрінің 23 қазандағы бұйрығына сәйкес, жаңа тәртіп 2026 жылғы 8 қарашада күшіне енеді. Алайда ол биылғы төртінші тоқсанға, яғни қазан, қараша және желтоқсан айларындағы аударымдарға да қолданылады.

Кімдердің аударымдары тексерілуі мүмкін?

Мемлекеттік кірістер комитетінің түсіндіруінше, салық органдарының назарын аудару үшін үш шарт бір мезгілде орындалуы керек:

• Азамат үш ай қатарынан әр айда кемінде 100 түрлі адамнан ақша алуы тиіс.
• Осы үш айда түскен ақшаның жалпы сомасы 1 557 000 теңгеден асуы керек.
• Аударымдар кәсіпкерлікке арналмаған жеке банк шотына түсуі қажет.

Яғни тек ақша аударымдарының көп болуы немесе ірі көлемде қаражат түсуі азаматты автоматты түрде салықтық тексеруге негіз болмайды.

2027 жылы не өзгереді?

Келер жылдан бастап шекті сома сол жылғы 1 қаңтарда белгіленген АЕК мөлшеріне қарай есептеледі.

2027 жылғы республикалық бюджет жобасында АЕК-ті 4325 теңгеден 4693 теңгеге көтеру қарастырылған. Егер бұл көрсеткіш бекітілсе, мобильді аударымдардың шекті сомасы 1 689 480 теңгеге жетеді.

Алайда бұл әзірге түпкілікті шешім емес. Бюджет жобасы Құрылтайда бекітіліп, президенттің қол қоюына жіберілуі тиіс.

Ал тексерілетін үш ай екі жылға қатар келсе, мәселен, 2026 жылғы желтоқсаннан 2027 жылғы ақпанға дейінгі кезең қамтылса, 2027 жылғы 1 қаңтардағы АЕК негізінде есептелген шекті сома қолданылады.

Мемлекеттік кірістер комитеті аталған үш шартқа сәйкес келетін азамат бірден салық заңнамасын бұзушы болып саналмайтынын түсіндірді. Сондай-ақ оның шотына түскен барлық ақша автоматты түрде кәсіпкерлік табыс деп танылмайды.