Отыз жыл бұрын жоғалған такси жүргізушісінің денесі құбыр ішінен табылды

Бакуда 30 жыл бұрын жасалған такси жүргізушісінің өлімі ашылып, айыпталушыларға қатысты қылмыстық іс сотқа жолданды, деп хабарлайды Politico.kz.

Әзірбайжан Бас прокуратурасының баспасөз қызметі хабарлағандай, Тергеу басқармасы 1996 жылғы 10 сәуірде Гюльмамед Байрамовты қасақана өлтіру дерегі бойынша тергеу амалдарын толық аяқтады. Бас прокуратура мен Ішкі істер министрлігінің ауқымды жедел-іздестіру шараларының нәтижесінде екі ер адамның алдын ала сөз байласып, пайдакүнемдік ниетпен қарақшылық шабуыл жасағаны анықталды.

Тергеу нұсқасы бойынша, күдіктілер «Нефтчиляр» метро станциясының маңында такси қызметін көрсетіп жүрген Г. Байрамовтың көлігіне отырып, Гарачухур кентіне бара жатқан жолда оны жіппен буындырып өлтірген. Қылмыс ізін жасыру мақсатында олар марқұмның денесін Гарачухурдағы бетон құбырдың ішіне тығып, автокөлігін бөлшектеп сатып жіберген және түскен ақшаны өзара бөліскен.

Күдіктілердің көрсетпелерін оқиға орнында тексеру барысында, Төтенше жағдайлар министрлігі қызметкерлерінің қатысуымен Г. Байрамовтың сүйектері табылды. Осыған байланысты, 2026 жылдың 22 сәуірінде екі ер адамға 2000 жылдың 1 қыркүйегіне дейін қолданыста болған Қылмыстық кодекстің тиісті баптары бойынша айып тағылып, сот шешімімен қамауға алу түріндегі бұлтартпау шарасы таңдалды.

Қазіргі уақытта бұл қылмыстық іс Баку ауыр қылмыстар жөніндегі сотқа жолданды.