Қазақстанда тағы да 44°C-қа дейін ыстық болады

28–30 шілде аралығында Қазақстанның басым бөлігінде ауа температурасы күрт көтеріліп, кей өңірлерде +44°C-қа дейін жетеді, деп хабарлайды Politico.kz.

Метеорологтардың мәліметінше, елдің оңтүстік өңірлерінде ауа температурасы +33...+44°C аралығында болады. Ал солтүстік аймақтарда +30...+38°C ыстық күтіледі. Батыс өңірлерден өзге аумақтарда ауа райында айтарлықтай өзгеріс болмайды.

Сонымен қатар апта ішінде бірқатар өңірде қысқа мерзімді жаңбыр жауып, найзағай ойнайды. Кей жерлерде жел күшейіп, бұршақ жаууы ықтимал. Шығыс Қазақстан облысында қатты жаңбыр күтіледі.

Синоптиктердің айтуынша, еліміздің оңтүстігінде Ираннан келетін құрғақ әрі ыстық ауа массаларының әсерінен жауын-шашын болмайды.

Осыған байланысты Қазақстанның көптеген өңірінде өрт қаупінің жоғары деңгейі сақталады. Мамандар тұрғындарды, әсіресе табиғат аясында демалушыларды өрт қауіпсіздігі ережелерін қатаң сақтауға шақырды.