Шавкат Рахмонов мансабын аяқтамайтынын мәлімдеді

Қазақстандық аралас жекпе-жек шебері Шавкат Рахмонов өзінің спорттық мансабының болашағына қатысты қауесеттерге жауап берді, деп жазады POLITICO.KZ.

Соңғы кездері спорт сүйер қауым арасында қазақстандық файтер Шавкат Рахмоновтың спорттық мансабына қатысты түрлі қауесет тарады. Ағылшын тілді, артынша ресейлік бұқаралық ақпарат құралдарында оның алған жарақатына байланысты UFC ұйымынан кететіні туралы ақпарат жарияланды.

Спортшының бапкері мен команда басшысы бұл ақпаратты бірден жоққа шығарғанымен, файтердің өзі біраз уақыт үнсіздік сақтап, жанкүйерлерді біраз алаңдатып қойған еді.

Ақыры, Шавкат Рахмоновтың өзі Х әлеуметтік желісіндегі парақшасында мәлімдеме жасап, барлық болжамға нүкте қойды. Ол жаттығуды тоқтатпағанын және октагонға оралуға асығатынын жеткізді.

«Күн сайын жаттығуда барымды саламын. Жақында ораламын, октагонға қайта шығуды асыға күтемін», – деп жазды спортшы.