Жамбылда үй әперемін деп халықты алдаған әкімдіктің бұрынғы қызметкері сотталды
Жамбыл облысында тұрғындарға баспана және әлеуметтік жәрдемақы рәсімдеуге көмектесеміз деп уәде берген екі азаматшаға қатысты сот үкімі шықты, деп хабарлайды Politico.kz порталы Orda.kz-ке сілтеме жасап.
Айыпталушылардың бірі Қордай ауылдық округі әкімдігінің бұрынғы қызметкері Айман Асқар болса, екіншісі Алматы қаласының тұрғыны Аида Жанаева.
Іс материалдарына сәйкес, сотталушылар 2019 жылдан бастап 2025 жылға дейін азаматтардың сеніміне кіріп, заңсыз әрекеттерді жүзеге асырған. Олар тұрғын үй кезегін жылжыту, мүгедектік тағайындау, балабақша ашу және қорлардан қаражат шығару сияқты қызметтерді ұсынған. Зардап шеккендер жеке куәліктері мен электрондық цифрлық қолтаңбаларын беріп, қомақты қаражатты қолма-қол немесе Kaspi қосымшасы арқылы аударған.
Тергеу барысында әйелдердің мемлекеттік органдарда іс жүзінде ешқандай өкілеттігі немесе байланысы болмағаны анықталды. Олар жиналған қаржыны өз қажеттіліктеріне жұмсаған. Сот кем дегенде он қылмыстық эпизодты дәлелдеді. Алаяқтардың құрбандары арасында көпбалалы аналар, мүгедек бала тәрбиелеп отырған отбасылар және халықтың әлеуметтік осал топтары бар. Бір ғана отбасы алаяқтарға сеніп, 8,4 миллион теңгесінен айырылған. Келтірілген жалпы шығын көлемі ондаған миллион теңгені құрайды.
Сот үкімімен Аида Жанаева 4 жыл 6 айға бас бостандығынан айырылды, алайда рақымшылық туралы заңға сәйкес оның жаза мерзімі 3 жылға дейін қысқартылды. Ал Айман Асқарға тағайындалған 4 жылдық жаза 2 жыл 8 айға өзгертілді. Екеуі де жазасын қауіпсіздігі орташа мекемеде өтеуі тиіс. Дегенмен сот үкімінің орындалуы бес жылға кейінге шегерілді. Осы уақыт аралығында сотталғандар пробациялық бақылауда болады.
Соңғы жаңалықтар
