Абай облысында шұғыл шақыртуға асыққан екі өрт сөндіруші жол апатынан қаза тапты

Абай облысында қызметтік көлікпен шұғыл шақыртуға бара жатқан екі азаматтық қорғау қызметкері жол апатынан көз жұмды, деп хабарлайды Politico.kz.

Марқұмдардың жақындары қайғылы оқиғаға асығыс жету туралы тапсырма себеп болуы мүмкін деп санайды.

Қайғылы жағдай Семей–Курчатов тасжолында болған. Алдын ала мәлімет бойынша, өрт сөндірушілер отырған Chevrolet көлігі қарсы бағытқа шығып кетіп, Kia автокөлігімен соқтығысқан.

Апат салдарынан 36 жастағы Ермек Сыдықов оқиға орнында қаза тапқан. Оның артында әйелі мен екі баласы қалды. Көлікте болған 33 жастағы Арнұр Әдікенов те алған жарақатынан көз жұмған. Оның артында әйелі мен баласы қалған.

Марқұмдардың туыстарының айтуынша, өрт сөндірушілерге Курчатов пен Семей арасындағы шамамен 130 шақырым жолды қысқа уақытта жүріп өту тапсырылған. Олар қызметкерлердің шұғыл шақыртуға асыққанын айтады.

Ермек Сыдықовтың анасы Анар Сыдықова ұлының басшылықтың тапсырмасын орындауға асыққанын жеткізді. Оның сөзінше, қызметтік тексеру барысында болған жағдайға жауапты тұлғалардың әрекетіне баға берілуі тиіс.

Абай облысының Төтенше жағдайлар департаменті оқиғаға байланысты қызметтік тергеп-тексеру басталғанын мәлімдеді. Тексеру қорытындысы бойынша лауазымды тұлғалардың әрекетіне құқықтық баға берілмек.

Ведомство қаза тапқан қызметкерлердің отбасыларына қажетті көмек көрсетіліп жатқанын хабарлады.

Сонымен қатар жол апатына қатысты полиция қылмыстық іс қозғады. Chevrolet көлігі соқтығысқан Kia автокөлігіндегі ерлі-зайыпты да қаза тапқан. Олардың артында алты бала қалған.