Алматыда алаяқ «өмірін сақтандырғысы» келетіндерден 620 млн теңге жинап алған

Қаржылық мониторинг агенттігінің Алматы қаласы бойынша департаменті ірі көлемдегі алаяқтық дерегін әшкереледі, деп хабарлайды Politico.kz.

Бұл жолы агенттіктегілер заңсыз инвестицияның жолын кесті: адамдарды 8 жыл бойы алдап келген күдікті қолға түсті,

«Күдікті 2013–2021 жылдар аралығында «Partners & Consultants» атты «Өмірді сақтандыру» жобасы арқылы өмірді сақтандыру бағдарламалары мен жинақтаушы сақтандыру салымдарына инвестиция салуға болады деген сылтаумен азаматтардың ақшасын иемдену схемасын ұйымдастырған. Азаматтарды өзіне бағынысты заңды тұлғалардың — «Evroasia Global Investment» АҚ және «Evropa Investment» ЖШС есепшоттарына ақша аударуға үгіттеп, жылына 12%-ға дейін тұрақты табысқа кепілдік берген», - деп хабарлайды агенттіктегілер.

Ол халықты сендіру үшін шын мәнінде жоқ жалған халықаралық сақтандыру бағдарламалары мен сертификаттарын  көрсеткен.

Қаражаттар қолма-қолсыз аударыммен қабылданып, салымшыларға жалған депозиттік және инвестициялық міндеттемелер туралы құжаттар берілген.

Нәтижесінде 270 жәбірленушіге 620 млн теңгеден астам материалдық шығын келтірілген. Күдікті ол ақшаны қолма-қол ақшаға айналдырып, қымбат көлік пен қымбат үй сатып алған.

Қазір күдікті қамауда.