Астанада балалар ауруханасынан өрт шықты

Астанадағы балалар ауруханасының ғимаратында өрт шықты. Оқиға орнындағы өртті елордалық ТЖД қызметкерлері жедел сөндірді, деп хабарлайды Politico.kz.

Сарайшық ауданында Қошқарбаев көшесі бойында орналасқан балалар ауруханасының жертөлесіндегі электр қалқанынан өрт шыққан. Хабарлама түскеннен кейін екі минут ішінде алғашқы өрт сөндіру бөлімшелері оқиға орнына жетіп, бірден тілсіз жауды ауыздықтауға кіріскен.

«Қауіпсіздік мақсатында науқастар мен аурухана қызметкерлері эвакуацияланды. Адамдар жақын маңдағы медициналық мекемеге, сондай-ақ ТЖМ мен жергілікті атқарушы органдар ұсынған автобустарға орналастырылды. Оқиға орнында өрт сөндіру штабы құрылып, жылыту пункті ұйымдастырылды», – деп хабарлады ТЖД.

Құтқарушылар 10 шаршы метр аумақты шарпыған өртті толық сөндірді. Зардап шеккендер жоқ. Қазір мамандар өрттің шығу себебін анықтап жатыр.