«Бір ай бойы көмек сұрадым»: Қызылордада екі айлық сәби өлімінен кейін іс қозғалды

Қызылордада екі айлық Іңкәррдың қайтыс болуына байланысты полиция қылмыстық іс қозғады, деп хабарлайды Politico.kz.

Марқұмның туыстары баланың жағдайы нашарлағанға дейін бір ай бойы бірнеше рет дәрігерлердің көмегіне жүгінгенін айтады.

Сәбидің қайтыс болғаны әлеуметтік желілерде тараған жазбалардан белгілі болды. Туыстарының айтуынша, қыздың алғашқы белгілері қайғылы жағдайдан шамамен бір ай бұрын байқалған. Осы уақыт аралығында ата-анасы баланы бірнеше рет дәрігерге көрсетіп, оның ішінде жекеменшік емханаға да барған.

Алайда жақындарының сөзінше, медициналық мамандар баланың іші «суықтап қалған» деген болжам айтып, оны инфекциялық бөлімге жатқызуға жолдама бермеген.

Кейін сәбидің жағдайы күрт нашарлап, ол жансақтау бөліміне түскен. Бала реанимацияда он күннен астам уақыт ем қабылдағанымен, дәрігерлер оның өмірін сақтап қала алмады. Туыстары сәби қайтыс болғаннан кейін оның сепсис диагнозы болғанын білгенін айтады.

«Бір ай бойы дәрігерлерден көмек сұрадым. Маған тек оның іші суықтап қалғанын айтты», – деді баланың туысы.

Ал емханада медицина қызметкерлерінің әрекетінде қателік болған-болмағанын сараптама нәтижесі арқылы анықтау қажеттігі айтылған.

Қызылорда облысының полиция департаменті сәби өліміне қатысты қылмыстық іс қозғалғанын растады.

Полиция мәліметінше, медицина қызметкерінің кәсіби міндеттерін тиісінше орындамауы салдарынан абайсызда баланың өліміне әкелу фактісі бойынша тергеу жүргізіліп жатыр.

Қазіргі уақытта оқиғаның барлық мән-жайын анықтауға бағытталған тергеу амалдары жүргізілуде. Қорытынды процессуалдық шешім тергеу аяқталғаннан кейін қабылданады.

Іс Қызылорда облысының полиция департаментінің бақылауында.