Павлодар облысында жөнделмеген жолға 45 млн теңге төленген

Павлодар облысында жөнделмеген жолға 45 млн теңге төленген
Фото: magnific.com

Павлодар облысында ауылішілік жолдарды жөндеуге бөлінген 45 млн теңгенің жымқырылғаны анықталды. Прокуратураның мәліметінше, әкімдік жөнделмеген жол үшін мердігер компанияға бюджет қаражатын аударған, деп хабарлайды Politico.kz.

Заңбұзушылықты Успен ауданының прокуратурасы жол құрылысы мен жөндеу жұмыстарының заңдылығын тексеру кезінде анықтаған.

Тексеру барысында Успен ауылдық округі әкімінің аппараты «МКК-Элит Строй» ЖШС-не жөнделмеген жол учаскесі үшін 45 млн теңге заңсыз аударғаны белгілі болды.

Осы дерек бойынша прокуратура әкімдік пен мердігер компанияның лауазымды тұлғаларына қатысты Қылмыстық кодекстің 189-бабы («Сеніп тапсырылған бөтен мүлікті иемденіп алу немесе талан-таражға салу») бойынша сотқа дейінгі тергеуді бастады.

Қазір істі Павлодар облысы бойынша Ұлттық қауіпсіздік комитетінің департаменті тергеп жатыр.

Айта кетейік, Қостанай облысында да білім саласына бөлінген бюджет қаражатының жымқырылғаны анықталған еді.

Бізді Google-дың негізгі дереккөздер тізіміне қосыңыз
Қосу