Қазақстан шағын және орта бизнесті цифрландыру бойынша көш бастап тұр

Mastercard SME Confidence Index 2026 зерттеуінің нәтижесіне сәйкес, Қазақстан шағын және орта бизнестің (ШОБ) төлемдерді цифрландыру деңгейі бойынша өңірде көш бастап тұр, деп хабарлайды Politico.kz POVestka Telegram арнасына сілтеме жасап.

Зерттеу қазақстандық кәсіпкерлердің цифрлық төлемдерді белсенді енгізіп, бизнесін заманауи технологияларға бейімдеп келе жатқанын көрсетті. Сонымен қатар кәсіпкерлердің алдағы жылға деген сенімі де жоғары.

ШОБ-тың 85%-ы онлайн төлемдерді пайдаланады

Қазақстандағы шағын және орта бизнестің 85%-ы онлайн төлемдерді қолданады. Ал 47% кәсіпкер төлемдерді негізінен қолма-қол ақшасыз қабылдайды, яғни бизнес біртіндеп дәстүрлі қолма-қол есеп айырысудан цифрлық төлемдерге көшіп келеді.

Сонымен қатар компаниялардың жартысынан астамы омниканалды бизнес-модельді қолданады. Бұл тұтынушылардың компаниямен әрі офлайн, әрі онлайн арналар арқылы өзара әрекеттесуіне мүмкіндік береді.

Қазақстандық кәсіпкерлердің бизнес перспективаларына деген көзқарасы да оң. Сауалнамаға қатысқан кәсіпкерлердің 50%-ы алдағы бір жылдағы бизнес перспективаларын оң бағалайды, ал 47%-ы кірістерінің одан әрі өсетінін күтеді.

Бұл оптимизм нақты экономикалық көрсеткіштермен де расталады. Зерттеуге сәйкес, 2025 жылы Қазақстандағы ШОБ компанияларының түсімі 46%-ға өскен.

Mastercard-тың Қазақстан және Орталық Азиядағы бас директоры Санжар Жамаловтың айтуынша, еліміз өңірдегі технологиялық тұрғыдан дамыған нарықтардың біріне айналып келеді.

«Қазақстан бүгінде өңірдегі технологиялық тұрғыдан ең дамыған нарықтардың бірі. Шағын және орта бизнестің онлайн төлемдерді кеңінен қолдануы кәсіпкерлердің жаңа цифрлық шешімдерді енгізуге дайын екенін көрсетеді. Дамудың келесі кезеңі төлемдерді цифрландырудан гөрі адами капиталды дамытуға, бизнестің тиімділігін арттыруға және заманауи қаржы құралдарын енгізуге байланысты болады», – деді Санжар Жамалов.

ШОБ-тың алдағы дамуындағы маңызды бағыттардың бірі – қызметкерлердің біліктілігін арттыру.

Зерттеуге сәйкес, компаниялардың 65%-ы қызметкерлерді оқыту мен олардың біліктілігін арттыруды бизнесті одан әрі дамытудың ең перспективалы бағыты деп санайды.

Бұл кәсіпкерлердің технологиялық жаңарумен қатар, адами капиталдың да маңызын түсінетінін көрсетеді. Білікті мамандарға инвестиция салу бизнес тиімділігін арттырып, компаниялардың ұзақ мерзімді өсуіне негіз бола алады.

Зерттеу авторларының пікірінше, Қазақстанның ШОБ секторында тиімділікті арттыру үшін әлі де айтарлықтай әлеует бар. Цифрлық төлемдердің кең таралуы – осы үдерістің маңызды бөлігі. Ендігі кезеңде адами капиталды дамыту, бизнес-процестердің тиімділігін арттыру және заманауи қаржы құралдарын кеңінен пайдалану қазақстандық кәсіпкерлердің бәсекеге қабілеттілігін одан әрі күшейте түспек.