Қазақстанда екі немесе үш АЭС пайда болуы мүмкін

Қазақстанда екі немесе үш атом электр станциясы пайда болуы мүмкін, деп мәлімдеді Мемлекет басшысы Қасым-Жомарт Тоқаев «Ana tili» газетіне берген сұхбатында, деп хабарлайды POLITICO.KZ.

Президент АЭС құрылысы туралы бірнеше елмен келіссөздер жүргізіліп жатқанын атап өтті. Оның айтуынша, бұл мәселе Владимир Путинмен кездесуде де талқыланған.

"Консорциум аясында бас оператор ретінде қазақстандық тарап әрекет етеді деп келістік. «Росатом» компаниясы мен Қытайдың атом энергетикасындағы озық тәжірибесі бар компаниялары қатысуы мүмкін. Сондай-ақ, батыс елдерінің де қызығушылығы байқалады", – деді Тоқаев.

Президенттің айтуынша, биыл конкурс өткізіліп, жобаның түпкілікті операторы анықталады.

"Атом электр станциясы – Қазақстан үшін өте маңызды. Тіпті, екінші және үшінші АЭС салуымыз да мүмкін. Бұл экономикамызды нығайтуға, энергетикалық тапшылықты шешуге зор мүмкіндік береді", – деп атап өтті ол.