Украина әскери көмек үшін АҚШ-қа $500 млрд құрайтын сирек металдарын беруге келісті

Украина АҚШ-тан алған әскери көмекті өтеу мақсатында $500 миллиард құрайтын сирек кездесетін металдарын Вашингтонға беруге келісті, деп хабарлайды POLITICO.KZ.

Бұл туралы АҚШ президенті Дональд Трамп Fox News арнасына берген сұхбатында мәлімдеді. Оның айтуынша, Украина бұл келісімге қақтығыстың нәтижесіне қарамастан қол қойған.

"Олардың жері өте құнды – сирек кездесетін металдар, мұнай, газ және басқа да ресурстарға толы. Біз Украинаға жүздеген миллиард доллар бөлдік, және мен бұл ақшаның қайтарылуын қамтамасыз еткім келеді", – деді Трамп.

Ол сондай-ақ, Вашингтонның Украинадағы табиғи ресурстарға қол жеткізуі соғыстың аяқталуына тәуелді емес екенін атап өтті.

"Украина Ресеймен бітім жасай ма, жоқ па – маңызды емес. Олар бір күні Ресейдің құрамына енуі мүмкін, не мүлде енбеуі мүмкін. Бірақ біз жұмсаған қаржы қайтарылуы керек. Сондықтан мен олардан $500 миллиард тұратын сирек металдар алатынымызды айттым. Олар бұған келісті", – деп мәлімдеді Трамп.

Бұл келісімнің нақты шарттары әзірге жарияланған жоқ. Бірақ сарапшылардың пікірінше, Вашингтон Украина экономикасының маңызды секторларының біріне тікелей бақылау орнатуы мүмкін.