Әйелі кешірім берді. Рахат Тұрлыханов жазадан тағы да құтылып кетті

Бұрынғы әнші, Мәжіліс депутаты Дәулет Тұрлыхановтың інісі Рахат Тұрлыхановтың әйелі шағымынан бас тартып, оған қатысты қозғалған қылмыстық іс тоқтатылды, деп хабарлайды Politico.kz.

Алматы қаласы полиция департаментінің мәліметінше тәртіп сақшылары Медеу ауданында болған бұл оқиғаның мән-жайын толық зерттеп, тиісті материалдарды жинаған. Алайда жары Алтынай өз талап-шағымынан және істі қарауға қатысудан бас тартқандықтан, полиция қылмыстық істі заңды түрде жапты.

"Арызданушы өз талап-шағымдарынан бас тартып, істі қарауға одан әрі қатысудан бас тартуына байланысты қылмыстық іс заңды негізде тоқтатылды", – деп хабарлады полиция.

Еске салайық, 15 наурызда бұрынғы әншінің әйелін ұрғаны үшін ұсталғаны туралы ақпарат тараған болатын. Ол кезде келіншек алдымен күйеуінің күш қолданғанын айтқанымен, кейін бұл сөзін жоққа шығарып, тек отбасылық жанжал болғанын жеткізді. Осыдан кейін Тұрлыхановқа әкімшілік хаттама толтырылып, 16 наурызда сот істі прокуратура мен полицияға қылмыстық белгілерді тексеру үшін кері қайтарған еді. Бұрынғы әнші соттың бұл шешіміне шағымданғанымен, апелляция оны күшінде қалдырды.

Бұл олардың отбасындағы бірінші дау емес. 2024 жылдың қаңтар айында Тұрлыханов әйелін ұрғаны үшін сотқа тартылып, өз кінәсін мойындаған. Сол кезде де әйелі оны кешіргенімен, сот заңбұзушылықтың бір жылда екінші рет қайталанғанын ескеріп оны 10 тәулікке қамауға алған еді. Кейін ерлі-зайыптылар желіде видео таратып, отбасында бәрі жақсы екенін мәлімдеген болатын.