Мырзахметовтің бірінші орынбасары: Айтқұрман Омарбеков кім?

Айтқұрман Омарбековтің әскери жолының басым бөлігі Республикалық ұлан мен Мемлекеттік күзет қызметінде өткен. Арнайы мақсаттағы күштерді басқарған генерал енді Қарулы Күштердің Бас штабына жетекшілік етеді. Оның қызмет жолы туралы не белгілі? Бұл туралы Politico.kz жазады. 

Ақорданың хабарлауынша, 5 қазанда Айтқұрман Жоламанұлы Омарбеков Қорғаныс министрінің бірінші орынбасары әрі Қарулы Күштер Бас штабының бастығы болып тағайындалып, бұрынғы қызметінен босатылды. Ол Маңғыстаудағы әскери оқу-жаттығуда 14 сарбаз қаза тапқаннан кейін министр болған Айдос Мырзахметовтің бірінші орынбасары атанды.

Мемлекеттік күзет қызметінің ресми өмірбаянында Омарбековтің 1977 жылы қазіргі Абай облысының аумағында туғаны көрсетілген. Үйленген, төрт баласы бар.

Ол Ресей Қорғаныс министрлігінің Әскери университетінде әскердегі моральдық-психологиялық жұмысты ұйымдастыру мамандығын меңгерген. Еуразия гуманитарлық институтында құқықтану бойынша білім алған.

Омарбеков 1997–2014 жылдары Республикалық ұланда қызмет етіп, кейін Мемлекеттік күзет қызметіне ауысқан. 2014–2022 жылдары осы мекемеде түрлі офицерлік және басшылық міндеттер атқарған.

2022 жылғы қаңтарда Мемлекеттік күзет қызметі бастығының орынбасары әрі Арнайы мақсаттағы күштердің қолбасшысы міндетін атқаруға кірісіп, ақпанда осы қызметке бекітілген. Оны бүгінгі тағайындауға дейін атқарды. Сол жылғы 22 қазанда оған Мемлекеттік күзет қызметінің генерал-майоры арнаулы атағы берілген.

Марапаттарының арасында ІІ дәрежелі «Айбын» ордені бар. «Параграф» анықтамасында оның 2026 жылғы 6 мамырда І дәрежелі «Айбын» орденін де алғаны көрсетілген.

Сондай-ақ ІІ және ІІІ дәрежелі «Мінсіз қызметі үшін», ІІІ дәрежелі «Елбасының қауіпсіздігін айбынды атқарғаны үшін», «Қазақстан Республикасы Мемлекеттік күзет қызметіне 25 жыл» және «Қазақстан Тәуелсіздігіне 30 жыл» медальдарымен марапатталған.

Айта кетейік, Омарбеков Қорғаныс министрлігінің басшылығы ауысып жатқан тұста қызметке келді. 24 қыркүйекте Маңғыстау облысында Каспий теңізіндегі оқу-жаттығу кезінде 17 әскери қызметші суға кетіп, 14-і қаза тапты. 27 қыркүйекте Дәурен Қосанов министр қызметінен босатылып, орнына Айдос Мырзахметов тағайындалды.

3 қазанда тағы үш басшы қызметінен кетті: Қорғаныс министрінің бірінші орынбасары әрі Бас штаб бастығы Қаныш Әбубәкіров, министрдің орынбасары Алмаз Жұмакеев және Әскери-теңіз күштерінің бас қолбасшысы Қанат Ниязбеков. Омарбеков осылайша Әбубәкіровтің орнына келіп отыр.

Жаңа министр Ақмола гарнизонындағы әскери бөлімдердің біріне тосын тексеру жүргізіп үлгерді. Қорғаныс министрлігінің мәліметінше, ол қызметтің ұйымдастырылуын, сарбаздардың тұрмысы мен казармалардың жағдайын тексерген.

Ал 27 қыркүйекте президент Қауіпсіздік Кеңесінің Аппараты мен Қорғаныс министрлігіне әскерді реформалау жоспарын он күн ішінде әзірлеуді тапсырған. Осы есеппен мерзім 7 қазанда аяқталады.