«Сарбаздың құны 100 мың теңге ме?»: Алматыда бұрынғы сарбаздың тағдыры жұртты алаңдатты

Алматыда бұрынғы сарбаз көмек сұрады, деп хабарлайды Politico.kz.

Алматыда бұрын әскерде болған Мадияр есімді жас жігіт қиын жағдайда қалған. Әлеуметтік желіде оның әскери қызмет кезінде жарақат алғаны және кейін денсаулығы күрт нашарлағаны туралы ақпарат тарады.

Жазба авторының айтуынша, Мадияр интернатта тәрбиеленген, жақын туыстары мен тұрақты баспанасы жоқ. Мектепті аяқтағаннан кейін автомойкада жұмыс істеп жүрген.

2025 жылдың мамыр айында оны әскерге шақырып, Семейдегі Төтенше жағдайлар министрлігіне қарасты 68303 әскери бөлімінде қызмет өткерген.

Автордың айтуынша, 6 шілде күні, Астана күні, Мадияр кино көріп отырған кезде Ахат есімді офицер оған белдіктің темір бөлігін қолданған. Кейін оның айтуынша, Паджаев есімді сарбаз да күш қолданған.

Оқиғадан кейін Мадиярдың ұзақ уақыт бойы медициналық көмекке мұқтаж болғаны, бірнеше ай ауруханада емделгені айтылған. Оған эпилепсия диагнозы қойылғаны туралы да ақпарат тарады.

Жазбада қазан айында офицер Мадиярдан «бәрі жақсы, шағымым жоқ» деген мазмұнда қолхат алып, оған 100 мың теңге бергені және Алматыға жібергені айтылған.

Алайда содан кейін оның денсаулығына қатысты мәселелер жалғаса берген. Мадиярдың басы ауырып, өзін әлсіз сезінгені, жұмыс кезінде бірнеше рет есінен танғаны жазылған.

Қазір оның денсаулығына байланысты күрделі мәселелер туындап, медициналық көмек пен операция қажет екені айтылды. Тамақ тұсына арнайы түтік орнатылғандықтан, сөйлей алмай жүргені де хабарланды.

Жазба авторы Мадиярға уақытша баспана тауып, оны қауіпсіз жерге орналастырғанын хабарлады. Ендігі басты мақсат — оның қажетті ем алуына жағдай жасау.

Сонымен қатар оқиғаға қатысы бар әскери қызметкерлердің әрекетіне құқықтық баға беріліп, кінәлілер жауапқа тартылуы тиіс екені айтылды.

Оқиғаның нақты мән-жайы мен әскери бөлімдегі жағдайға қатысты ресми органдардың түсініктемесі әзірге белгісіз.