Алматыдағы жол апаты туралы сұмдық деректер айтқан заңгер қамауға алынды

Белгілі заңгер Әділетхан Молдаханның қамауға алынғаны белгілі болды. Бұл туралы оның көмекшілері мәлімдеді, деп хабарлайды Politico.kz.

Бұған дейін заңгер әрі блогер атышулы әл-Фараби даңғылындағы жол апаты туралы резонанс істе жарияланымдар жасаған еді.

Алматы қалалық полициясы заңгердің ұсталғанына қатысты пікір білдірді.

«Алматы қаласының полиция департаменті азамат М.-ға қатысты көрінеу жалған ақпарат тарату дерегі бойынша сотқа дейінгі тергеп-тексеруді тіркеді. Күдікті уақытша ұстау изоляторына қамалды. Тергеп-тексеру амалдары жалғасуда», - деп жауап берді қалалық полиция редакциямыздың жолдаған сауалына.

Айта кетейік, Алматыдағы әл-Фараби даңғылында қайғылы оқиға болып, 3 адам оқиға орнында көз жұмған еді. Заңгер Әділетхан Молдахан полицейлердің бұл іске қатысы бар-жоғын бірінші болып айтып, бірнеше лауазымды тұлғанын аты-жөнін айтқан еді. Өз сөзінде ол сол түні Zeekr және тағы бірнеше көлік Достық даңғылынан бастап жарыс ұйымдастырғанын ашып көрсетті. Заңгердің айтуынша, көліктер әл-Фараби бойынша сағатына 250 шақырым жылдамдықпен жүріп, екі тұтас жолақты кесіп өтіп, жалған нөмірлерді пайдаланған.