Ақтауда сабақ үстінде оқушылар төбелесіп, біреуі ауруханаға түсті

Ақтауда дене шынықтыру сабағында оқушылар төбелесіп, біреуі ауруханаға түсті, деп хабарлайды Politico.kz.

Ақтауда дене шынықтыру сабағы кезінде 10 және 11-сынып оқушылары арасында жанжал шығып, арты төбелеске ұласқан. Оқиғадан кейін 10-сыныптың екі оқушысы медициналық көмекке жүгінген. Олардың біреуі ауруханаға жатқызылған.

Полицияның мәліметінше, жанжалға қатысқан оқушылар анықталып, ата-аналарымен бірге полиция бөліміне жеткізілген. Жасөспірімдермен және олардың заңды өкілдерімен профилактикалық әңгіме жүргізілген.

Оқиғаға қатысты барлық мән-жай зерттеліп, қажетті материалдар жиналған. Балаларының тәрбиесі мен оқуына қатысты міндеттерін тиісінше орындамаған, сондай-ақ кәмелетке толмағандардың бұзақылық жасауына жол берген ата-аналар жауапкершілікке тартылған.

Жиналған материалдар тиісті шешім қабылдау үшін кәмелетке толмағандардың істері жөніндегі комиссияға жолданды.

Жасөспірімдер профилактикалық есепке қойылды. Полиция олардың өздерімен және отбасыларымен профилактикалық жұмысты жалғастырады.