“Киевтен Мәскеуге жауап”: Зеленский Ресейдің мұнай нысандарына соққыны күшейтетінін ескертті
Украина Ресей аумағындағы мұнай өңдеу зауыттарына жасалатын соққыларды жиілетуді жоспарлап отыр, деп хабарлайды Politico.kz.
Бұл туралы Украина президенті Владимир Зеленский мәлімдеді.
Оның айтуынша, Киев мұндай әрекеттерді Ресейдің Украина энергетикасы мен басқа да инфрақұрылым нысандарына бағытталған шабуылдарының күшеюіне жауап ретінде қарастырады.
Зеленский Украина тарапы Ресейдің қыс мезгілі қарсаңында соққы жасалатын нысандар тізімін кеңейтуді жоспарлап отырғанын көрсететін құжаттар алғанын айтты. Оның сөзінше, энергетика және көлік инфрақұрылымы, жолдар, мектептер мен ауруханалар қауіпке ұшырауы мүмкін. Бұл мәлімдемелер әзірге тәуелсіз түрде расталған жоқ.
Украина президенті Киевтің Ресейдегі азаматтық нысандарға мақсатты түрде соққы жасауды жоспарламайтынын, алайда мұнай инфрақұрылымына бағытталған шабуылдарды күшейтетінін жеткізді.
«Біздің энергетикамызға жасалған шабуылдарға олардың энергетикасына соққы беру арқылы жауап беруіміз керек. Ең алдымен, соғысты қаржыландыруға табыс әкелетін мұнай өңдеу зауыттарына», – деді Зеленский.
Соңғы күндері Ресей күштері Киевке жасалатын шабуылдарды күшейткен. Украина тарапы энергетикалық, көлік және өзге де инфрақұрылым нысандары зардап шеккенін хабарлады. Мәскеу өз кезегінде соққылардың әскери инфрақұрылыммен байланысты нысандарға бағытталғанын айтып, азаматтық нысандарды әдейі нысанаға алатынын жоққа шығарады.
Сонымен қатар Зеленский Мәскеуден энергетикалық нысандарға соққыларды тоқтатуға немесе бейбіт келіссөздерге қайта оралуға дайын екенін білдіретін нақты белгі көрмегенін мәлімдеді.
Соңғы жаңалықтар
