Зеленский Ұлттық гвардия жауынгерлеріне алғыс айтты

Украина президенті Владимир Зеленский өзінің Telegram арнасында Ұлттық гвардия күніне орай жауынгерлерге алғысын білдірді, деп хабарлайды POLITICO.KZ.

Президент өз құттықтауында Ұлттық гвардия сарбаздарының ерлігі мен батылдығына тоқталып, олардың Украинаны қорғаудағы ерекше еңбегін жоғары бағалады.

«Бүгін – Украина Ұлттық гвардиясының күні. Бұл күні біз Ұлттық гвардияның барлық жауынгерлеріне, әрбір бөлімшесіне және жауынгерлік бригадаларына алғысымызды білдіреміз. Олар елді батылдықпен қорғап, басқыншыларды жоюда елеулі жетістіктерге қол жеткізіп келеді. Біз мұны өте жоғары бағалаймыз», – деді Зеленский.

Украина басшысы сондай-ақ 2014 жылдан бері және әсіресе 24 ақпаннан кейінгі кезеңде Ұлттық гвардия жауынгерлерінің ерлігі мен табандылығына тоқталды.

Зеленский әсіресе Мариуполь қорғаушылары мен ресейлік тұтқында отырған «Азов» жауынгерлерін атап өтті.

«Өкінішке қарай, қазір ресейлік тұтқында отырған жауынгерлерімізді ұмытпаймыз. Біз оларды босатып, елге қайтару үшін дипломатиялық деңгейде барлық мүмкіндіктерді қолданып жатырмыз», – деді ол.

Зеленский сөзінің соңында Ұлттық гвардияға адал қызметі үшін алғыс айтып, «Ұлттық гвардиямызға даңқ!» деп түйіндеді.