Алматы тауларында 19 жыл бұрын жоғалған альпинистті қызы ескі жолқапшығы арқылы таныды

Алматы облысының тауларында мәйіті табылған ер адамның туыстары анықталып, 19 жыл бұрын жоғалған альпинистті өз қызы таныды, деп хабарлайды Politico.kz.

Жақында Беларусьтен келген саяхатшылар Северцов мұздығында адам сүйектерін тапқан еді. Мәйітті таудан түсірген соң оның осыдан 20 жылға жуық уақыт бұрын жоғалып кеткен қазақстандық екені белгілі болды. Бұл ақпаратты марқұмның қызы әлеуметтік желідегі парақшасында растады. Ол кездейсоқ олжа үшін шетелдік туристерге үлкен алғысын білдірді.

«Таңертең құрбым жолқапшық суреті бар жазбаны жіберіп, оның біздікіне қатты ұқсайтынын айтты. Мен қарап шығып, оның шынымен әкемнің жолқапшығы екенін түсіндім, өйткені бұл кеңестік ескі станковый жолқапшық еді. Құтқарушылар маған тергеушінің нөмірін берді. Біз телефонмен сөйлестік, ол сақталған барлық құжаттар мен фотосуреттерді жіберуді сұрады. Оның ішінде әкемнің сол жолқапшықпен түскен суреттері де бар. Кейінірек тергеуші қайта хабарласып, жолқапшық ішінен әкемнің атына берілген куәлік табылғанын айтты», – деді марқұмның қызы.

Еске салайық, 19 тамызда белоруссиялық туристер Талғар ауданындағы мұздықтан белгісіз адамның мәйітін байқаған. Олар нақты координаттарды фото және бейнематериалдармен бірге құтқарушыларға жедел түрде жіберген. Осы мәліметтерді алғаннан кейін оқиға орнына Төтенше жағдайлар министрлігінің қызметкерлері ұшып барды. Олар мәйітті сәтті эвакуациялап, оны жергілікті жедел-тергеу тобының мамандарына тапсырды.